Mae Eisteddfod Genedlaethol Rhondda Cynon Taf wedi dod i Bontypridd yr wythnos hon. Dych chi’n adnabod yr ardal?

Efallai dych chi wedi darllen y llyfr Y Fawr a’r Fach: Straeon o’r Rhondda. Cafodd y llyfr ei ysgrifennu gan Siôn Tomos Owen. Mae e’n arlunydd, cyflwynydd, bardd ac awdur.

Roedd y llyfr yn dweud straeon difyr am ei blentyndod a’i arddegau.

Nawr mae e wedi cyhoeddi llyfr arall o straeon am fyw yn y Rhondda. Mae Y Fawr a’r Fach 2: Mwy o Straeon o’r Rhondda yn dweud ei hanes am dyfu’n ddyn a dod yn dad, ac am y lle mae’n ei garu – y Rhondda.

Mae’r llyfr yn addas ar gyfer dysgwyr lefel Sylfaen ac yn rhan o’r gyfres Amdani, sy’n cyhoeddi llyfrau darllen yn arbennig at gyfer oedolion sy’n dysgu Cymraeg.

Mae lluniau du a gwyn gan Siôn ar gyfer pob un o’r 18 stori fer. Mae geirfa ar bob tudalen a rhestr eirfa yng nghefn y llyfr.

Bydd straeon Y Fawr a’r Fach 2: Mwy o Straeon o’r Rhondda yn cael eu darllen bob diwrnod ar Faes D yn yr Eisteddfod Genedlaethol am 2 o’r gloch.

‘Mwy o straeon doniol i’w rhannu’

Mae Siôn Tomos Owen yn dweud:  “Pan sgwennes i’r llyfr cyntaf nôl yn 2018 ges i lawer o hwyl ond ges i drafferth yn dewis pa storïau i’w cynnwys, ac o’n i’n gwybod byse rhaid i mi sgwennu ail lyfr rhywbryd! Ac ar ôl magu fy mhlant yn y cwm hefyd, mae gen i hyd yn oed mwy o straeon doniol i’w rhannu.

“Mae’r ymateb i’r llyfr cyntaf wedi bod yn wych a dw i wedi siarad a gwneud ffrindiau gyda chymaint o ddysgwyr Cymraeg sydd wedi darllen fy llyfr – pobl o Brighton i Lithuania, Gwlad Pwyl a hyd yn oed Santa Barbara yng Nghaliffornia! Ac mae pawb yn dweud eu bod nhw’n mwynhau’r ffaith bod yna gartwnau yn cyd-fynd gyda’r straeon hefyd, sy’n gwneud i fi wenu.

“Un o fy hoff bethau am deithio yw cwrdd â phobl newydd ac mae’r niferoedd dw i wedi cwrdd â nhw yn ddiweddar sy’n dysgu Cymraeg mor galonogol. Mae’r profiad yn gwneud i mi eisiau ysgrifennu mwy o lyfrau i ddysgwyr oherwydd y cynnydd yn nifer y bobl sy’n dysgu ac mae brwdfrydedd dysgwyr i siarad Cymraeg yn anhygoel!” meddai Siôn.  

Mae Y Fawr a’r Fach 2: Mwy o Straeon o’r Rhondda ar gael nawr (£6.99, Y Lolfa).