Moch Coch Hapus

Pryd wnaethoch chi ddechrau’r busnes Moch Coch?

Wnaethon ni symud i’r fferm yma yn Nhalog yn 2019. Ar ôl gweithio am 15 mlynedd fel aciwbigwr roeddwn i eisiau treulio mwy o amser yn dilyn fy niddordebau mewn ffermio.

’Dyn ni wedi sefydlu fferm bioamrywiaeth ac wedi dechrau cadw lloi a defaid nawr hefyd.

Dechreuon ni Moch Coch yn 2021 a nawr ’dyn ni’n gwerthu ein cig mewn marchnadoedd a siopau bwyd ar draws Cymru.

Wnaethon ni adeiladu uned arbennig ar y fferm i baratoi’r cig a gwneud charcuterie. Doedden ni ddim wedi gweld chorizo maes yn y siopau ac roedd hyn yn rhywbeth roedden ni eisiau ei weld, ei brynu a’i fwyta.

’Dyn ni wedi ennill nifer o wobrau am ein cig. Mae chorizo Moch Coch wedi ennill tair seren gan y Great Taste Awards, y Coppa wedi ennill un seren, a’r cig eidion Cymreig wedi’i awyrsychu wedi ennill un seren hefyd.  Ym mis Medi eleni gaethon ni ein henwebu ar gyfer gwobr Golden Fork.

Beth sy’n gwneud Moch Coch yn wahanol?

’Dyn ni’n magu ein moch yn yr awyr agored ar ein fferm – ’dyn ni’n angerddol am hyn.

Mae’n bwysig iawn i ni bod gan ein hanifeiliaid y rhyddid i grwydro ac archwilio a gwneud fel maen nhw eisiau.

’Dyn ni’n cadw moch Tamworth. Mae côt goch hardd gyda nhw. Maen nhw’n addas iawn ar gyfer eu cadw nhw yn yr awyr agored. Mae Tamworths yn tyfu’n araf iawn ac yn byw ar ddeiet naturiol.  Mae hyn yn rhoi blas anhygoel i’r cig dych chi ddim yn ei gael yn y rhan fwyaf o borc heddiw.

’Dyn ni’n cynhyrchu prosciutto, coppa a chig eidion gyda chynhwysion syml a naturiol iawn – halen mor, sbeisys ffres ac weithiau ychydig o win!

Defnyddio homeopathi i drin yr anifeiliaid

Pam mae’n bwysig i chi ddefnyddio homeopathi i drin yr anifeiliaid ar y fferm?

Yn 2020 wnes i gwblhau cwrs am sut i drin anifeiliaid fferm gyda homeopathi.

Mae defnyddio homeopathi yn golygu bod angen defnyddio llawer llai o feddyginiaethau. ’Dyn ni’n defnyddio homeopathi fel cam cyntaf i drin iechyd yr anifeiliaid, mae hyn yn lleihau straen ac yn trin symptomau yn gyflym cyn iddyn nhw ddatblygu. ’Dyn ni ond yn defnyddio meddyginiaethau os bydd angen. ’Dyn nhw ddim yn cael unrhyw driniaethau hormonau neu wrthfiotigau arferol.

Dach chi hefyd yn cynhyrchu Surop Eirin Ysgaw Ji-Binc ar y fferm…

Dechreuodd hyn oherwydd fy nghefndir mewn iechyd a lles. Mae eirin ysgaw yn llawn gwrthocsidyddion, fflafonoidau, fitaminau a mwynau sy’n cynnal eich system imiwnedd.

Dw i’n casglu’r eirin ysgaw ac yn gwneud y surop â llaw o rysáit draddodiadol.

Mae’n gwneud diod gynnes, gyfoethog a chysurus gydag ychydig o sbeis – addas iawn ar gyfer yr adeg yma o’r flwyddyn!

Sut dach chi’n mwynhau bwyta’r salami a chigoedd eraill?

’Dyn ni’n hoffi cael charcuterie fel appetizer pan ’dyn ni’n gwneud bwyd i deulu a ffrindiau adre. ’Dyn ni’n hoffi ei gael gydag olifau a nibls bach eraill. Mae’n edrych yn fendigedig ynghanol y bwrdd bwyd ac yn hawdd a chyflym iawn i roi at ei gilydd pan dych chi’n disgwyl gwesteion.

Dyma rai o fy ffefrynnau:

Tafelli tenau o gig eidion Cymreig wedi’i awyrsychu ar ddail roced gyda darnau bach o gaws gafr meddal neu parmesan, ac olew olewydd – mae’n gwneud plât rhannu gwych.

Mae’r Coppa yn wych ar gyfer lapio. Yn ddiweddar wnaethon ni weini coppa Moch Coch wedi’i stwffio â crème fraîche garlleg, a radis wedi’u piclo, ar graceri.

Gallwch chi hefyd lapio coppa o amgylch parseli asbaragws a’u ffrio mewn padell.

www.mochcoch.wales

www.jibinc.co.uk

Dyma Moch Coch

Bethan Morgan a’i phartner Rhun sy’n rhedeg cwmni Moch Coch.

Mae Moch Coch ym mhentref Talog, Caerfyrddin.

Dechreuon nhw’r busnes yn 2021.

Maen nhw’n gwneud cig a salami.

Maen nhw wedi ennill llawer o wobrau am eu cig.

Mae Bethan a Rhun yn cadw moch Tamworth. Mae cot goch gyda’r moch.

Maen nhw’n byw yn yr awyr agored.

Mae Bethan yn defnyddio homeopathi ar ei fferm i drin yr anifeiliaid.  

Roedd Bethan yn gweithio fel aciwbigwr cyn symud i’r fferm.