Dw i’n hoffi… gyda Jack Quick

Jack, beth ydy…

…dy hoff ffilm?

Dw i’n hoff iawn o’r ffilm Good Will Hunting.

…dy hoff lyfr?

The Grinch gan Dr Seuss, achos dw i’n darllen i Jesi fy merch yn aml….

dy hoff fwyd?

Basai rhaid i fi ddweud cinio dydd Sul.

…dy hoff adeg o’r flwyddyn?

Nadolig achos dw i’n joio bod o gwmpas teulu a ffrindiau.

…dy hoff ffordd o ymlacio?

Wrth ochr pwll nofio ar wyliau yn rhywle cynnes.

…dy hoff ffordd o gadw’n heini?

Mynd i’r gym… pan dw i’n teimlo fel mynd!

…dy hoff gerddoriaeth?

Stereophonics!

…dy hoff stori ar Pobol y Cwm?

Anodd dewis un, achos dw i wedi bod yn lwcus gyda’r straeon dw i wedi’u cael.

Ond dw i’n mwynhau unrhyw olygfa pan mae lot o gast gyda ni achos ’dyn ni wastad yn joio!

…dy hoff le i fynd ar wyliau?

Majorca neu garafán yn Saundersfoot, Sir Benfro.

…dy hoff ddywediad Cymraeg?

Mae chwarae’n troi’n chwerw.

Dyma Jack Quick

Actor ydy Jack.

Mae o’n dod o bentref Glyn-nedd yn wreiddiol.

Dechreuodd Jack actio yn y theatr.

Nawr, mae Jack yn cyflwyno Stwnsh Sadwrn.

Rhaglen i blant ydy Stwnsh Sadwrn.

Mae o hefyd yn actio yn Pobol y Cwm.

Mae’n chwarae rhan Rhys Llywelyn.

Mae gynno fo ferch fach, Jesi.

Pobol y Cwm yn 50 oed!

Opera sebon ydy Pobol y Cwm.

Mae’n dathlu ei phen-blwydd yn 50 oed ym mis Hydref.

I ddathlu’r pen-blwydd bydd set Pobol y Cwm ar agor i’r cyhoedd.

Bydd pobl yn gallu gweld set pentref dychmygol Cwmderi.

Bydd rhai o actorion yr opera sebon yn arwain y teithiau. Maen nhw’n cynnwys Jonathan Nefydd (Colin), Sera Cracroft (Eileen) a Dyfan Rees (Iolo). Bydd cyfle i bobl ofyn cwestiynau wrth edrych o gwmpas y setiau.

Bydd y teithiau yn ddwyieithog.

Mae Pobol y Cwm yn cael ei ffilmio yng nghanolfan Stiwdios BBC Cymru ym Mae Caerdydd.

Bydd y teithiau’n cael eu cynnal ar y dyddiadau yma:

• Dydd Sadwrn, Hydref 12
• Dydd Sul, Hydref 13
• Dydd Iau, Hydref 17
• Dydd Gwener, Hydref 18
• Dydd Sadwrn, Hydref 19

Bydd wyth taith ar gael bob dydd.

Gallwch chi brynu tocynnau ar wefan Pobol y Cwm.

Hanes Pobol y Cwm

Pobol y Cwm yw opera sebon deledu hynaf y BBC.

Mae wedi cael ei darlledu ar S4C ers 1982.

Cafodd y bennod gyntaf ei darlledu ar Hydref 16, 1974 am 7.10pm.

Y llinell agoriadol oedd: “Bore da, Maggie Mathias” gan Harri Parri. Yr actor Charles Williams oedd yn actio cymeriad Harri Parri.

Symudodd y stryd fawr i stiwdio’r BBC yn Llandaf yn 1996.

Mae’r set bresennol wedi bod ym Mae Caerdydd ers 2011.

Dechreuodd rhai o sêr mawr Cymru eu gyrfa yn actio yn Pobol y Cwm fel yr actor Hollywood Ioan Gruffudd, seren y West End a’r sgrin fach Iwan Rheon, a’r seren ffilm a theledu Alexandra Roach.

Mae Pobol y Cwm yn cael ei darlledu rhwng nos Fawrth a nos Iau am 8 o’r gloch. Mae rhifyn omnibws bob dydd Sul am 6.10pm, gydag isdeitlau Saesneg.

Bydd S4C yn darlledu nifer o raglenni arbennig i ddathlu’r pen-blwydd. Mae’n cynnwys rhaglen ben-blwydd nos Fercher, Hydref 16 am 8pm ar S4C, S4C Clic a BBC iPlayer.